सम्झौता विपरीत प्रस्तुत हुँदै भारत, झनै मिच्यो आनन्द बजारको सिमा

हेमन्त न्यौपाने आनन्दबजार, फाल्गुन१५ पुनर्वास नगरपालिकाले आनन्द बजारमा कल्भर्ट निर्माण कार्य सुरु गरे देखि नै अवरोध पुर्याएको भारतले आज सम्म पनि कल्भर्ट निर्माणमा अनेक वाहाना देखाउदै निर्माण कार्यमा अवरोध गरिरहेको छ । 

सहायक प्रमुख जिल्ला अधिकारी प्रेम बहादुर कुवँरले मंगलबार भारतीय पक्षसंग गरेको सहमति लत्याउदै भारतले कच्ची निर्माणमा पनि काम हुन दिएको छैन । 

पहिले कल्भर्ट निर्माण हुन लागेको स्थानबाट ४०० मिटर पर गस्ती गर्ने भएता पनि कल्भर्ट निर्माण कार्य सुरु भएदेखि उक्त भुमिलाई विवादित बताएको थियो । तर अहिले सो स्थानलाई एकतर्फी स्तम्भ मान्न थालेको छ ।

प्रष्ट नेपाली भुमिमा रहेको डुम्रीको रुख लाई नै आफुहरुले नेपाल भारत स्तम्भ मान्ने गरेको एसएसबीका प्रहरी निरीक्षक टि. के. हंकले बताएका छन । 

शुक्रबार आनन्द बजारका स्थानीय केदार खड्कालाई कल्भर्ट निर्माणका क्रममा बोलेको आरोपमा भारतका स्थानीयहरुलाइ निर्घात कुटपिट गरेको स्वयं खड्काले बताएका छन । 

कल्भर्ट निर्माण उपभोक्ता समितिका सचीव चन्द्रमणि गैरेलाई समेत स्थानीय तथा एसएसबीले भारत गए सुरक्षित नहुने भन्दै धम्याएका छन ।

कच्ची कल्भर्ट बनाउन सहमति भएपनि भारतले सो स्थानमा एक कोदालो माटो खन्न दिएको छैन । टाढाबाट माटो ल्याएर हाल्न परेको पुनर्वास नगरपालिकाका प्राबिधिक लालमन तामाङ्गले बताए । 

उच्चपदस्थ सरकारी कर्मचारी र सरकारलाई सिमाको माया नभएका कारण सिमा क्षेत्रको घाउ झन झन बल्झदै गएको आनन्द बजारका स्थानीय मीन बहादुर शाही बताउछन ।

कल्भर्ट निर्माणमा माटोको मात्र प्रयोग गरिंदा बर्षामा माटो बगेर जाने निश्चित नै छ । जसरी भएपनि कल्भर्ट टिकाउ र दीर्घकालीन नहोस भन्ने भारत चाहान्छ । 

नेपाली भुमिलाई दिनानुदिन भारतले विवादित बनाउदै आएको प्रति सरकारले कुनै प्रभावकारी कदम चाल्न नसकेको आनन्द बजारका अध्यक्ष दल बहादुर शाहि बताउछन ।